ജയ്പുര്‍: കമിതാക്കള്‍ക്ക് നേരെ സദാചാര ഗുണ്ടകളുടെ ആക്രമണം. രാജസ്ഥാനില്‍ ഭരത്പുര്‍ ജില്ലയിലാണ് സംഭവം.പെണ്‍കുട്ടിയെ 20 ല്‍ അധികം പേരാണ് കൂട്ടമായി ചേര്‍ന്ന് മര്‍ദിച്ചത് . ഇതിന്റെ വിഡിയോ സമൂഹ മാധ്യമങ്ങളില്‍ പ്രചരിച്ചു. ഓണ്‍ലൈനില്‍ ദൃശ്യങ്ങള്‍ വ്യാപകമായി പ്രചരിച്ചിട്ടും നടപടിയെടുക്കാന്‍ പൊലീസ് തയാറാകാത്തതിനെതിരെ വ്യാപക വിമര്‍ശനം ഉയരുന്നുണ്ട്.
അതെ സമയം സംഭവം എപ്പോള്‍ നടന്നതെന്നാണെന്ന് വ്യക്തമല്ല. ആളൊഴിഞ്ഞ സ്ഥലത്ത് സംസാരിച്ചിരുന്ന കമിതാക്കളെ ജനക്കൂട്ടം വളയുകയായിരുന്നു. ഈ സമയം ആണ്‍കുട്ടി സംഭവ സ്ഥലത്ത് നിന്ന് ഓടി രക്ഷപ്പെട്ടു. പെണ്‍കുട്ടിയെ പിടികൂടി മര്‍ദ്ദിക്കുന്ന ദൃശ്യങ്ങളാണ് പുറത്തുവന്നത്.
പെണ്‍കുട്ടിയെ റോഡിലൂടെ വലിക്കുന്നതും ദുപ്പട്ട അഴിച്ചുമാറ്റുന്നതും വിഡിയോയില്‍ കാണാം.
സഹായത്തിനായി പെണ്‍കുട്ടി അലറുന്നുണ്ടെങ്കിലും ആരും രക്ഷപ്പെടുത്താന്‍ തയാറാകുന്നില്ല. തുടര്‍ന്ന് പെണ്‍കുട്ടിയെ ഗുണ്ടകള്‍ അടിക്കുന്നതും ദൃശ്യങ്ങളില്‍ വ്യക്തമാണ്.അതേസമയം സംഭവത്തിന്‍റെ സത്യാവസ്ഥ അന്വേഷിക്കുമെന്നും കുറ്റവാളികളെ പിടികൂടുമെന്നും പൊലീസ് അറിയിച്ചു .
