ന്യൂഡല്ഹി: എന്ഫോഴ്സ്മെന്റ് ഡയറക്ടറേറ്റില് നിന്നുലഭിച്ച നോട്ടീസിനെ പരിഹസിച്ച് ആം ആദ്മി പാര്ട്ടി. മോദിയുടെ പ്രിയപ്പെട്ട ഏജന്സിയില്നിന്ന് ഒരു പ്രണയലേഖനം ലഭിച്ചു എന്നാണ് ആം ആദ്മി പാര്ട്ടി വക്താവ് രാഖവ് ഛദ്ദ ഇ.ഡി നോട്ടീസിനെപറ്റി പറഞ്ഞത്. പാര്ട്ടി ദേശീയ സെക്രട്ടറി പങ്കജ് ഗുപ്തയ്ക്കാണ് എന്ഫോഴ്സ്മെന്റ് ഡയറക്ടറേറ്റ് നോട്ടീസ് നല്കിയത്. ആം ആദ്മി പാര്ട്ടി കഴിഞ്ഞ ഇലക്ഷനില് കള്ളപ്പണം വെളുപ്പിക്കാന് ശ്രമിച്ചു എന്നാണ് ഇ.ഡിയുടെ ആരോപണം. ഡല്ഹി മുഖ്യമന്ത്രി അരവിന്ദ് കെജ്രിവാളും സംഭവത്തില് പ്രതികരിച്ചിട്ടുണ്ട്.
‘ഡല്ഹിയില് അവര് ഞങ്ങളെ ഐടി വകുപ്പ്, സിബിഐ, പോലീസ് എന്നിവ ഉപയോഗിച്ച് തോല്പ്പിക്കാന് ശ്രമിച്ചു. പക്ഷേ ഞങ്ങള് 62 സീറ്റുകള് നേടി. പഞ്ചാബ്, ഗോവ, ഉത്തരാഖണ്ഡ്, ഗുജറാത്ത് എന്നിവിടങ്ങളില് ഞങ്ങള് വളര്ന്നുകൊണ്ട് ഇരിക്കുേമ്ബാള് ഞങ്ങള്ക്ക് ഒരു ഇഡി നോട്ടീസ് ലഭിക്കുന്നു. ഇന്ത്യയിലെ ജനങ്ങള്ക്ക് സത്യസന്ധമായ രാഷ്ട്രീയം വേണം. ഈ തന്ത്രങ്ങള്കൊണ്ട് ബിജെപി ഒരിക്കലും വിജയിക്കില്ല. അവര് ഞങ്ങളെ ശക്തരാക്കും’- കെജ്രിവാള് ട്വീറ്റ് ചെയ്തു.
മുന് എ.എ.പി നേതാവും ഇപ്പോള് കോണ്ഗ്രസില് ഉള്ളയാളുമായ സുഖ്പാല് സിങ് ഖൈര ഉള്പ്പെടെയുള്ള ആളുകളെ കള്ളപ്പണം വെളുപ്പിക്കല് കേസില് ചോദ്യം ചെയ്യാന് വിളിപ്പിച്ചിട്ടുണ്ട്.
മയക്കുമരുന്ന് കടത്ത്, വ്യാജ പാസ്പോര്ട്ടുകള് എന്നിവയുമായി ബന്ധപ്പെട്ട രണ്ട് എഫ്ഐആറുകള് കേന്ദ്ര ഏജന്സി ഖൈറയ്ക്കെതിരെ രജിസ്റ്റര് ചെയ്തതായാണ് സൂചന. 2019 ല് ആപ് വിട്ട് കോണ്ഗ്രസില് പോയ ആളാണ് ഖൈര. എ.എ.പിക്കായി അമേരിക്കയില് നിന്ന് ഏകദേശം 100,000 യുഎസ് ഡോളര് സംഭാവന സമാഹരിച്ചതായും ഏജന്സി വൃത്തങ്ങള് പറയുന്നു.
സര്ക്കാരിെന്റ കാര്ഷിക നിയമങ്ങള്ക്കെതിരെ ശബ്ദമുയര്ത്തിയതിനാണ് തന്നെ കേന്ദ്ര ഏജന്സികള് ലക്ഷ്യമിടുന്നതെന്നാണ് സുഖ്പാല് സിങ് ഖൈര പറയുന്നത്.തിരഞ്ഞെടുപ്പില് പരാജയപ്പെട്ടതിന് ശേഷം പാര്ട്ടിയെ ‘സ്വഭാവഹത്യ’ ചെയ്യാന് ബിജെപി ശ്രമിക്കുന്നുവെന്ന് ആപ് വക്താവ് രാഖവ് ഛദ്ദ പറഞ്ഞു.’എന്ഫോഴ്സ്മെന്റ് ഡയറക്ടറേറ്റിന് ബിജെപി ആസ്ഥാനത്തിന് തൊട്ടടുത്ത് ഒരു ഓഫീസ് സ്ഥലം നല്കണം. അവര് ബിജെപിയുടെ മുന്നണി സംഘടനയാണ്’-ഛദ്ദ പറയുന്നു.
