തിരുവനന്തപുരം: സ്വര്ണക്കടത്ത്, ലൈഫ് മിഷന് തുടങ്ങിയ വിവാദങ്ങളുമായി ബന്ധപ്പെട്ട ചാനല് ചര്ച്ചകളില്നിന്നു വിട്ടുനില്ക്കാന് സി.പി.എം തീരുമാനിച്ചെന്ന് റിപ്പോര്ട്ട്. കമ്മ്യൂണിസ്റ്റ് വിരുദ്ധ മനോഭാവത്തോടെയാണ് മാധ്യമങ്ങള് പ്രവര്ത്തിക്കുന്നതെന്ന സി.പി.എം സംസ്ഥാന സെക്രട്ടേറിയറ്റ് യോഗത്തിന്റെ വിലയിരുത്തലിന് പിന്നാലെയാണ് തീരുമാനം.
നേരത്തേ ഏഷ്യാനെറ്റ് ന്യൂസ് ചാനലിന്റെ ചര്ച്ചകള് കമ്യൂണിസ്റ്റ് വിരുദ്ധത ചൂണ്ടിക്കാട്ടി സി.പി.എം ബഹിഷ്കരിച്ചിരുന്നു. സ്വര്ണക്കടത്ത്, ലൈഫ് മിഷന് തുടങ്ങിയ വിഷയങ്ങളിലെ സംവാദങ്ങളില് പാര്ട്ടി പ്രതിനിധികള് തത്കാലം പങ്കെടുക്കില്ലെന്ന് എ.കെ.ജി സെന്ററില് നിന്നും ചാനലുകളെ അറിയിച്ചെന്നാണ് റിപ്പോര്ട്ടുകള്. എന്നാല് ചാനലുകളിലെ മറ്റു ചര്ച്ചകളില് സി.പി.എം പങ്കെടുക്കും.
ചാനല് ചര്ച്ചകള്ക്കായി പ്രതിനിധികളെ എ.കെ.ജി സെന്ററില് നിന്നു നിയോഗിക്കുന്ന രീതിയാണ് സി.പി.എം പിന്തുടരുന്നത്. ഒരേ വിഷയം തന്നെ ആവര്ത്തിച്ചു ചര്ച്ച ചെയ്യുമ്ബോള് അതില് പങ്കെടുക്കേണ്ടെന്നാണ് പാര്ട്ടി തീരുമാനം.
കേരളത്തില് മാധ്യമങ്ങള്ക്ക് കോര്പ്പറേറ്റ് താത്പര്യങ്ങളാണുള്ളതെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് കഴിഞ്ഞ ദിവസം വിമര്ശനം ഉന്നയിച്ചിരുന്നു. വികസനരംഗത്തെ സര്ക്കാരിന്റെ ശ്രമങ്ങള്ക്ക് മാധ്യമങ്ങള് പരിഗണന നല്കുന്നില്ലെന്നും ഈ സമീപനം തിരുത്തണമെന്നും സെക്രട്ടേറിയറ്റ് യോഗം ആവശ്യപ്പെട്ടിരുന്നു.
