ഇസ്ലാമാബാദ്: ഋഷഭ് പന്ത് സമ്മര്‍ദമൊന്നും ബാധിക്കാത്ത കളിക്കാരനാണെന്നും അദ്ദേഹത്തിന്റെ ബാറ്റിങ് നന്നായി താന്‍ ആസ്വദിക്കാറുണ്ടെന്നും മുന്‍ പാകിസ്താന്‍ ക്യാപ്റ്റന്‍ ഇന്‍സമാം ഉള്‍ ഹഖ്.
ഇംഗ്ലണ്ടിനെതിരായ നാലാം ക്രിക്കറ്റ് ടെസ്റ്റില്‍ സെഞ്ചുറിയുമായി തിളങ്ങിയ ഇന്ത്യന്‍ വിക്കറ്റ് കീപ്പര്‍ ബാറ്റ്‌സ്മാന്‍ ഋഷഭ് പന്തിന്റെ പ്രകടനം ഇന്ത്യന്‍ വിജയത്തില്‍ നിര്‍ണായകമായിരുന്നു. പന്തിനെ പോലൊരു താരത്തെ ഇതുവരെ കണ്ടിട്ടേയില്ലെന്നാണ് ഇന്‍സമാമിന്റെ അഭിപ്രായം.
പന്ത് ബാറ്റ് ചെയ്യുമ്ബോഴെല്ലാം വീരേന്ദര്‍ സെവാഗിന്റെ ഇടംകൈ പതിപ്പായിട്ടാണ് തനിക്ക് തോന്നിയതെന്നും ഇന്‍സി ചൂണ്ടിക്കാട്ടി. തന്റെ യൂട്യൂബ് ചാനലിലായിരുന്നു ഇന്‍സമാമിന്റെ അഭിനന്ദനം.
”തീര്‍ത്തും മിടുക്കനാണ് ഋഷഭ് പന്ത്. സമ്മര്‍ദം തെല്ലും ബാധിക്കാത്ത ഒരു കളിക്കാരനെ വളരെക്കാലത്തിനുശേഷം ഞാന്‍ കണ്ടു. ടീം ആറിന് 146 എന്ന അവസ്ഥയില്‍ നില്‍ക്കുകയാണെങ്കിലും പന്ത് ഇന്നിങ്‌സ് ആരംഭിക്കുന്ന പോലെ മറ്റാരും ചെയ്യില്ല. പിച്ചോ മറ്റേ ടീം എത്ര റണ്‍സ് സ്‌കോര്‍ ചെയ്‌തെന്നോ ഒന്നും നോക്കാതെ അദ്ദേഹം അദ്ദേഹത്തിന്റെ ഷോട്ടുകള്‍ കളിക്കുന്നു. സ്പിന്നര്‍മാര്‍ക്കും ഫാസ്റ്റ് ബൗളര്‍മാര്‍ക്കുമെതിരേ ഒരേപോലെ മികവ് പുലര്‍ത്താന്‍ പന്തിന് സാധിക്കുന്നു. അദ്ദേഹത്തിന്റെ ബാറ്റിങ് ഞാന്‍ നന്നായി ആസ്വദിക്കാറുണ്ട്. സെവാഗ് ഇടതു കൈകൊണ്ട് ബാറ്റ് ചെയ്യുന്നത് പോലെയാണ് പന്തിനെ കാണുമ്ബോള്‍ തോന്നുക.” – ഇന്‍സമാം വ്യക്തമാക്കി.
