ഫുട്ബോള്‍ ലോകം ഞെട്ടലില്‍; സ്പെയിന്‍ കോച്ചിനെ പുറത്താക്കി

മോസ്കോ: ലോകകപ്പിന് പന്തുരുളാന്‍ മണിക്കൂറുകള്‍ മാത്രം ബാക്കി നില്‍ക്കേ പരിശീലകന്‍ ജുലന്‍ ലോപ്പറ്റെഗ്വിയെ സ്പെയിന്‍ പുറത്താക്കി. റഷ്യയില്‍ സ്പാനിഷ് ടീം അവസാനവട്ട ഒരുക്കങ്ങള്‍ നടത്തുമ്പോഴാണ് ഫുട്ബോള്‍ ഫെഡറേഷന്‍റെ നടപടിയുണ്ടായിരിക്കുന്നത്.

ജൂണ്‍ 14-നാണ് ലോകകപ്പ് തുടങ്ങുന്നത്. 15ന് പോര്‍ച്ചുഗല്ലിനെതിരേയാണ് സ്പെയിന്‍റെ ആദ്യ പോരാട്ടം. യൂറോ ചാമ്പ്യന്മാരായ പോര്‍ച്ചുഗല്ലിനെതിരേ മത്സരിക്കാന്‍ തയാറെടുക്കുന്ന സ്പാനിഷ് സംഘത്തിന് തീരുമാനം കടുത്ത സമ്മര്‍ദ്ദമുണ്ടാക്കും.

കോച്ചിനെ പുറത്താക്കുന്നതിന്‍റെ കാരണം സ്പെയിന്‍ ഫെഡറേഷന്‍ വ്യക്തമാക്കിയില്ലെങ്കിലും റയല്‍ മാഡ്രിഡ് പരിശീലകനായി ലോപ്പറ്റെഗ്വിയെ നിയമിച്ചതാണ് സ്ഥാനം തെറിക്കാന്‍ കാരണമായിരിക്കുന്നതെന്നാണ് റിപ്പോര്‍ട്ട്.

ചൊവ്വാഴ്ചയാണ് ലോപ്പറ്റെഗ്വിയെ സ്പാനിഷ് വന്പന്മാരായ റയല്‍ പരിശീകനായി നിയമിച്ചത്. സിനദീന്‍ സിദാന്‍ രാജിവച്ച ഒഴിവിലേക്ക് മൂന്ന് വര്‍ഷത്തേക്കായിരുന്നു നിയമനം. ലോകകപ്പിന് മണിക്കൂറുകള്‍ മാത്രം ബാക്കി നില്‍ക്കേ സ്പെയിന്‍ മുഖ്യപരിശീലകനായി ഇനി ആരെ കണ്ടെത്തും എന്നുള്ളതും ശ്രദ്ധേയമാണ്.

prp

Related posts

Leave a Reply

*